بسم الله الرحمن الرحيم
انتشرت في الفترة الأخيرة مواضيع نصب من شباب نفوسهم ضعيفة واستحلوا مال الناس بدون وجه حق ومابقاش يفرق معاهم حلال من حرام وبقت موضة ان كل واحد من دول يخش عالمنتديات والمواقع المشهورة زي مصراوي وغيره وغيره عشان يحط فيها موضوعه أو رسالته اللي مالهاش هدف غير النصب على خلق الله ومحاولة الحصول على رصيد الموبايل بأي شكل من الأشكال.
ولعل من أشهر الأمثلة عن هذا الموضوع:
1- النصب بطريقة الكود اللي بيحول الرصيد
2- النصب عن طريق تقديم خدمات من على الانترنت مقابل رصيد على الموبايل، وطبعا بتكون الفيزا اللي اتعمل بيها الخدمات دي مسروقة وبتلاقي الخدمة اتوقفت بعد شهر ولا شهرين بدون سبب ولما تراسل الشركة يقولولك أصلك حرامي ومشتري الخدمة بفيزا مسروقة، وبالتأكيد صاحبنا اللي انت حولتله الرصيد بيبقى ساعتها فص ملح وداب وغير رقم موبايله وابقى هاته لو تعرف...
وانا واحد من الناس حصل فيا الموقف رقم 2 بحذافيره من عضو هنا في منتدى العرض كان بيعرض دومينات للبيع مقابل كرت شحن ولحد النهاردة مش عارف اجيبه ولا اجيب معلومات عنه،،، برغم تهافة وضآلة المبلغ إلا انه مش عارف كم الغيظ والقرف من الحركة ذات نفسها ومن وقف الحال اللي حصل لما الخدمة دي اتوقفت بشكل مفاجيء وفجأة بقى الدومين بتاعي بيفتح صفحة مكتوب فيها رسالة مفادها ان صاحب الدومين ده حرامي وبيسرق الفيزا بتاعة الناس عشان كده وقفناه
كل ده بسبب واحد لا عنده ذوق ولا احساس ولا ضمير وبقى الحلال والحرام عنده سواسية
المهم ربنا هداني لحاجة هاتكون هي طريق النهاية لكل كلب من دول، بس مش لازم اعملها لوحدي..
لازم انا وانت وهو وهو وكل واحد يتنصب عليه أو يشوف محاولة نصب بأي شكل من الأشكال عن طريق الانترنت انه يعمل اللي انا هاقول عليه ده.
بالمختصر المفيد:
موقع وزارة الداخلية أخيرا افتتح قسم أو صفحة خاصة ببلاغات النصب عن طريق الانترنت
سواء كان عن طريق الموبايلات وتحويل الرصيد
أوالفيزات المسروقة والخدمات المزيفة
أو حتى الايميلات الوهمية اللي بتيجي تقللك انا ورثت مبلغ كام مليون دولار بس عاوزك تساعدني في تهريبه من البلد واديك ماعرفش كام في المية
أو حتى اي طريقة أخرى يقوم صاحبها باستغلال شبكة الانترنت للايقاع بضحاياه
طب هل أي حد متغاظ من واحد يروح يحط فيه شكوى كده وخلاص ؟؟
لأ طبعا، الوزارة مش بتتخذ أي اجراء ولا أي تحرك غير لما تتعدد شكاوى الناس من نفس النصاب
وليا قريب في الداخلية حكالي بنفسه عن بعض النصابين اللي تم القبض عليهم من خلال شكاوي المواطنين وفيه كمان منهم اللي خد حبس سنة أو حبس 6 شهور
طب نعمل ايه ونساعد ازاي عشان نوقف الظاهرة المتفشية جديد دي وطالعة في المقدر ؟؟
الموضوع بسيط جدا...
إليكم رابط صفحة بلاغات النصب الالكتروني على موقع وزارة الداخلية:
http://www.moiegypt.gov.eg/arabic/departments%20sites/antitreasure/balaghatلما تخش عليه هاتلاقي انك لازم تكتب بياناتك الشخصية كاملة،
زي رقم بطاقتك وعنوان سكنك واسمك بالكامل وخلافه
وده لضمان جدية مقدم البلاغ وانه مش واحد بيتسلى وخلاص
وهاتلاقي خانة تكتب فيها تفاصيل الشكوى بتاعتك أو البلاغ بتاعك
ودي طبعا تكتب فيها كل تفاصيل طريقة النصب المستخدمة
ولو تعرف أي بيانات عن النصاب يبقى طبعا لازم تكتبها (مهما كنت شايف انها تافهة أو مالهاش لازمة) لأن كلمة منك على كلمة من غيرك بتجمع جملة مفيدة يقدروا هما يستخدموها للايقاع بذلك النصاب
حتى لو مش عارف اسمه (وده بيكون غالبا) لكن فيه حجات كتير بتسهل عليهم الوصول اليه من غير اسمه
زي رقم موبايله أو ايميله أو اسم عضويته في المنتدى اللي حصلت فيه عملية النصب أو أي حاجة تانية تعرفها
حاجة مهمة جدا بقى وهي انك تحط رابط للصفحة أو الموقع اللي استخدمه النصاب
عشان يدخلوا عليها ويتأكدوا بنفسهم انك مش بتقدم بلاغ كاذب
وكمان عشان يقدروا يشوفوا زوار الموضوع ويحاولوا يتواصلوا معاهم في محاولة منهم للعثور على شخص يكون اتعامل مع النصاب ده ويكون عرف عنه أي معلومة تساعدهم
هاتلاقي كمان مكان لإرفاق ملف أو صورة
وده ليه استخدام مهم جدا جدا
انك تاخد Print Screen من الصفحة المستخدمة للنصب وترفعهالهم في الوزارة
طب لازمتها ايه دي ؟؟؟ عشان فيه بعض المواقع ممكن لما يلاقوا فيها موضوع نصب يقوم المشرف يحذفه
يبقى كده الرابط اللي انت بعتته للوزارة في البلاغ بتاعك مش شغال
وساعتها مش هايقدروا يتأكدا هل بلاغك ده صحيح ولا وهمي
فالصورة بتديهم تأكيد
وللعلم فقسم مكافحة جرائم الانترنت دلوقتي أصبح له سلطة معترف بها دوليا وبيستخدمها في مراسلة أصحاب المواقع لمعرفة الآيبيهات الخاصة بالأعضاء المتهمين بالنصب على صفحات الموقع،،
ومن خلال الآيبي بتتحدد شركة الانترنت المزودة للخدمة،،
وأي حد شغال في أي شركة انترنت أكيد طبعا عارف ان الشركة لازم بتحتفظ بـ Log كامل بالآيبيهات المستخدمة خلال آخر 60 يوم ومن خلاله بتقدر تعرف أنهي آيبي كان على أنهي خط تليفون يوم كام في الشهر والساعة كام بالظبط،، متهيألي بعد كده بيبقى الباقي سهل أوي عليهم انهم يجيبوا النصاب بمجرد التأكد من البلاغات المقدمة ضده ومن تعدد الشكاوي والبلاغات من أشخاص مختلفة
آخر خطوة بتحتاج تملاها في الموقع هي اختيار الجهات المعنية بالتحقيق في الشكوى الخاصة بك
ودي انت بتعملها عشان تسهل عليهم
يعني هاتلاقي خانة فيها كل الجهات التابعة لوزارة الداخلية وبتختار منهم أنهي واحدة اللي انت عاوز الشكوى بتاعتك تروحلها (لأنه طبعا لو الشكوى أو البلاغ بتاعك راح لمكان غلط يبقى مفيش منه فايدة)
هاتختار منهم مديرية أمن المنطقة بتاعتك أو التابعة ليك
ولو تعرف محافظة أو مكان النصاب (وتكون طبعا ذكرته في الشكوى)
يبقى هاتختار كمان مديرية أمن المنطقة اللي هو تابع ليها
وبكده تبقى كملت بلاغك،،
أتمنى نكون كلنا ايد واحدة في ايقاف هؤلاء النصابين والحرامية
الموضوع كله مش هاياخد منك 5 دقايق
بس لما ييجي واحد من دول يعمل موضوع في المنتدى عن حركة تحويل الرصيد مثلا
لازم كلنا نقدم فيه بلاغ
لما عشرة ولا خمستاشر واحد هايقدموا بلاغ ضد نفس الشخص ساعتها بيتأكدوا ان مش كل دول بيتهموه زور أو بيتبلوا عليه وفعلا بيقوموا بتحركاتهم عشان يجيبوه من قفاه (وحصلت والله العظيم)
الموقع أهو مرة تانية:
http://www.moiegypt.gov.eg/arabic/departments%20sites/antitreasure/balaghatواتمنى ان محدش يشوف حاجة زي كده ويسكت ويقول وانا مالي
الـســـاكــت عـن الـحـــق شـيـطــــان أخـــرس
ولازم نكون كلنا ايد واحدة ونعمل حاجة ايجابية تنفعنا وتطهر المجتمع من الكلاب اللي زي دول
بالله عليك أخي الكريم
تقديم البلاغ مش هاياخد منك اكتر من دقايق ضمن الساعات اللي بتقضيها كل يوم على شبكة الانترنت
فلا تبخل بدقائق معدودة قد تحمى أخيك أو أختك من عملية نصب محترفة يقوم بها انسان مخادع بلا ضمير
وحاجة أخيرة:
أي حد بيخش على أي منتديات أو مواقع أخري غير الدي في دي
ياريت ياريت ياريت ياخد الموضوع بتاعي كده كله كوبي وبيست ويحطه هناك
بدون ذكر اسمي ولا أي حاجة فالهدف هنا هو ليس تحقيق الشهرة
وإنما الهدف هو نشر الموضوع لحماية وتطهير المجتمع قدر الامكان
والله الموفق لما فيه الخير
أخوكم في الله،
بغــــــــــــــــدادى
الإثنين 31 مارس 2008, 1:43 am